O día 1 de marzo, Cantar Delas, ofreceu o primeiro concerto do seu novo proxecto musical “Cantos de raíz. Da raíz do canto” no que se inclúen pezas tradicionais que foron transmitidas a través da música popular ademais doutras composicións nas que as mulleres ocupan un papel fundamental na conservación e anovación da música popular.

A actuación tivo lugar ás 18:30 h. no Cuartel Vello de Taboada, ateigado de público, con motivo da XXXIII Festa do caldo de ósos, evento dedicado este ano ás Mulleres. Tamén actuaron como invitadas as Pandereteiras Rechouchíos de Taboada.

Na festa do caldo de ósos de 2025 as mulleres foron as protagonistas: a pregoeira, Olga Novo, premio Nacional de poesía no 2020, a música de raíz cantada polas mulleres de Cantar Delas e as pandereteiras Rechouchíos, a exposición fotográfica “As donas do caldo de ósos” de catro fotógrafas da provincia de Lugo que retrataron a doce mulleres nas súas cociñas, en homenaxe a todas as mulleres que mantiveron a elaboración dun prato que é único de Taboada, e o cartel, que representa a dúas mulleres que levan olas de caldo sobre as súas cabezas, nun deseño da ilustradora Rosa Cabanas, da Estrada.

Visibilidade e relevancia absoluta da muller, nunha homenaxe ás Mulleres como conservadoras e transmisoras dun legado gastronómico e cultural.